 |
| Demo e-Gamelan |
Maca judul nduwur tumrape sing seneng IT apamaning wong awam, mesthine
nang ati ana pitakonan, malah kayane penasaran.
Jane keprigen kuwe?
Sing dimangsud e-Gamelan utawa Elektronik Gamelan jane swara instrumen
Gamelan sing dikasilaken nganggo srana media elektronik, istilah IT-ne instrumen
digital. Dadi wujud virtualisasi utawa digitalisasi nada-nada Gamelan asli
(analog) wilahan not saben instrumen sing ditransformasi dadi data digital
liwat program komputer.
Sejen maning kaya kendang elektronik, electone, syntetizer, piano
elektronik, utawa alat-alat musik elektronik liane, duwe standar vibra utawa
frekuensi sing padha, sebab wiwit mula pancen nada-nada asal kecipta sekang
data elektronik.
Sedheng nada-nada e-Gamelan kecipta sekang Gamelan asli Kraton Kasunanan Surakarta
lan Pura Pakualaman Yogyakarta sing kawit sekang asale wis duwe ciri wanci
dhewek-dhewek, mulane “ngeng” utawa bobot nada-nada sing dikasilaken padha
presis ngambi Gamelan asline. “Ngeng” Gamelan versi Keraton Surakarta lan Yogyakarta
kuwe beda, mulane kasil digitalisasine kudune beda, wong vibrane uga beda. Nang
ngkene unike. Sampeyan padha egin penasaran?, mayuh tek jeki meleng sewetara artikel
ngisor kiye.
Udinus
Ngembangna Gamelan Digital
Jaman siki wis
arang krungu Gamelan ditabuh. Kayane ora patiya digople lan wis disisihaken. Masrakat,
klebu masrakat Jawa Tengah dhewek padha molahi ninggal musik asli warisane para
leluhur. Kiye dhampak globalisasi sing nggerus budaya masrakat. Nggo nyegah
ilange musik Gamelan, Kraton Kasunanan Surakarta Hadiningrat (Kraton Solo)
krejabareng ngambi Universitas Dian Nuswantoro (Udinus) Semarang gawe Gamelan
elektronik sing diarani e-Gamelan.
Pengageng Kraton
Solo, Kanjeng Pangeran (KP) Edy S. Wirabhumi ngendika yen program kiye nggo ngenalaken
seni budaya Gamelan maring masrakat sandunya. Kejaba kuwe, mangrupa usaha men bocah
nom-noman lewih ngreti Gamelan, gampang lan teles sinau babagan Gamelan.
“Digitalisasi Gamelan
kiye kasil kerjabareng antarane Kraton Solo lan Udinus Semarang. Launching
dianakaken bulan Juni 2012, acarane dijokena merga strategi pasar
lan owahing teknologi cepet banget,” ngendikane Edy S. nang Bangsal Semorokotho
Kraton Solo.
Tujuan
kerjabareng gawe e-Gamelan kiye, jan-jane nggo mindhah musik Gamelan dadi wujud
digital, dadi wong akeh ora susah repot-repot padha gedhabyagan saumpamane
garep nabuh Gamelan. Musik kiye teles ditabuh lan disinaoni masrakat nang ngumah.
“Umpamane garep blajar nabuh Gamelan nang ngumah, teles milih instrumen apa
sing garep ditabuh miturut senenge ngati” ngendikane.
Edy preslah; “proses
rekaman musik Gamelan manggon nang Sasana Handrawina Keraton Solo. Ningen siki
nembe nganggo Gamelan Kiai Gora. Kabeh instrumen Gamelan Kiai Gora ngliwati
proses rekaman kejaba kendhang. Ana 16 instrumen sing wis direkam lan
kapingarepe wong-wong sandunya sing garep sinau nggamel teles ngakses data
digital kiye”.
Rektor Udinus
Semarang, Dr. Edi Nur Sasongko nyritakaken yen mula bukane kepencut gawe e-Gamelan
kiye jan-jane salah sijine wujud prihatine Udinus maring nom-noman utawa generasi
muda, nyatane akeh sing ora ngreti babagan Gamelan. Miturut panjenegane, seni
karawitan lan Gamelan sing wujud e-Gamelan kiye teles ngrambah sandunya lan teles
regenerasi.
“Udinus duwe
niat nglestarikaken Gamelan lan kepengin nliti lewih jero babagan Gamelan nganggo
cara kerjabareng ngambi Kraton Solo”.
Miturut Rektor,
e-Gamelan teles diunggah liwat komputer utawa ipad sing siki sering dienggo
nom-noman. Udinus duwe teknologi informasi sing teles digabungaken ngambi
budaya Jawa. Program kaya kiye jan-jane wis tau ana, ningen program kiye lewih
kumplit ngenani cacahe instrumen lan liya-liyane” preslahe (Okezone).
e-Gamelanku
Nglestarikaken Budaya Sing Digerus Jaman
Kewatir ana kedaden ilange budaya Gamelan
nang era globalisasi kiye mecut krenteg seklompok pecinta budaya gawe inovasi
nggolet keprigen carane nglestarekaken warisan leluhur.
Elektronik Gamelan
Kampus Udinus utawa sering disebut eGamelanku mujudaken inovasi sing wis
direalisasikaken nggo nylametna Gamelan sekang kepunahan. eGamelanku mujudaken
virtualisasi sekang obyek lan rekaman swara sing dijimot sekang Gamelan Kyai
Sri Kuncoro Mulyo Lokananta Surakarta. Kiye kasil penelitian tim LPPM Universitas
Dian Nuswantoro sing dipandhegani Y. Tyas Catur Pramudi, S.Si., M.Kom nganggo
dana Hibah Strategi Nasional DIKTI tahun 2009 lan 2010.
Miturut ketua
komunitas angkatan 2011, Ekaprana Wijaya, eGamelanku digawe ora nggo ngganti Gamelan
asli. “Tujuan digawene eGamelanku kuwe nggo media pembelajaran, dadi ora ambil-alih
posisi Gamelan sing asli,” tambah Eka wektu ditemoni nang kampus.
Nyatane anggota
komunitas kiye nom-noman sekang SMA nganti perguruan tinggi. “Sapa baen teles
nggabung, komunitas latihan saben dina Rebo nang gedong B lantai 1 Udinus. Akeh
siswa SMA utawa mahasiswa sing dolan ngeneh. Prelune silaturahmi utawa kepengin
latihan Gamelan. Latihane free alias gratis,” preslahe Eka.
 |
| Pagelaran e-Gamelan |
eGamelanku
nggekeng pisan mujudaken visine. Prelune ngipuk-ipuk rasa seneng lan bangga
maring Gamelan, buktine dheweke wis pentas nang CYCU Taiwan, University
Kebangsaan Malaysia, Singapura, 8-11 Show Metro tv, malahan padha gerilya
nekani sekolah-sekolah SMA nang Jawa Tengah.
Kejaba
sosialiasasi langsung meng sekolah-sekolah, tim uga sosialisasi liwat website http://www.eGamelanku.com sing materine cara nyinau e-Gamelan. “Nang website ana sub menu, molaih sekang tata
cara nabuh, ngenalaken notasi, tutorial, single user, malahan pengunjung teles
nabuh Gamelan orkestra lan milih dhewek antarane 10 pilihan instrumen Gamelan, sing
diarani ricikan.” (Portalsemarang.com).
eGamelanku
Olih Restu Gusti Mung Sekang Kraton Surakarta
Kasil kajian saweneh Siswa lan
Mahasiswa, angger nggatekaken variabel sikap; kognitif, affektif lan psikomotorik,
ditemokna dominasi masalah sikap affektif lan psikomotorik. Mulane multimedia
pembelajaran kiye ditujokena nggo nuwuhaken lan ningkataken sikap affektif lan
psikomotorik mau.
Multimedia eGamelanku kuwe ora duwe
mangsud ngganti Gamelan asli, tujuan sebenere nggo ningkataken minat lan
psikomotorik sing nganggo men eGamelanku kiye teles dadi batu loncatan nuju
maring Gamelan sing sebenere.
Paparan kiye diaturna Tim Pengembang
eGamelanku wektu audiensi ngambi Gusti Mung (Dra. GRAy. Koes Moertiyah)
pengageng Kraton Surakarta Hadiningrat. Dene gandheng-cenenge ngemu maksud lan
tujuan dibangune multimedia eGamelanku. Panjenenganipun nyengkuyung pisan
gagasan mau lan ndukung eGamelanku dikembangaken, klebu piwulang sinden lan
macapat. Penjaluke seni budaya Jawa tetep diuri-uri lan lestari, nganggo
pirang-pirang cara, klebu liwat teknologi informasi.
Kraton Surakarta Aweh Idin Matenaken eGamelanku
Universitas Dian Nuswantoro (Udinus)
akhire olih idin matenaken eGamelanku sekang Kraton Surakarta Hadiningrat.
Pihak kraton uga ngidinaken Udinus masang kasil karyane nang Apps-Store.
Pekasilane dibagi rata antara pihak Udinus ngambi Kraton Surakarta. Idin kiye
resmi kecakup sejrone pasal-pasal nota kesepakatan sing wis diteken bareng nang
Kraton Surakarta Hadiningrat lan Universitas Dian Nuswantoro, Minggu (1/4),
manggon nang Bangsal Smarakata liwat Pengageng Sasono Wilapa, Dra GRAy Koes
Murtiyah Wandansari, M.Pd.
Udinus olih gawe eGamelanku sing dasare
rekaman swara lan gambar nganggo teknologi informasi. Nggawa aran Gamelan,
nganggo logo Kasunanan Surakarta lan ndaftarna dadi Hak Ciptane Udinus.
“eGamelanku bakal gampang nyebar
liwat handphone, dadi Gamelan Kraton Surakarta akhire teles ditabuh,
dirungokna, lan disinaoni notasine sewektu-wektu nang sapa baen wong salumahing
bumi,” preslahe Gusti Mung parabane GRAy Koes Murtiyah Wandansari.
Kraton nganggep maen pisan
kesepakatan kiye, mergane ndeleng Udinus duwe niat sing kuat, bareng
nguri-nguri budaya Gamelan. Miturut panjenengane akeh gendhing lan baleman
anggitane Sinuhun Paku Buwono IV-X sing wis diaku dadi duweke publik. “Ningen
nggo keperluan digitalisasi kiye, wektu publik ngundhuh nang internet, baguse
kudu ditambah pengerten ngenani eksistensine, awujud pengakon hak tumrap kekayaan
intelektual (HAKI),” ature.
Warisan Budaya; Rektor Udinus Edi
Noersasongko, ngomongna yen wis dadi kewajiban kampus sing nguasani teknologi
informasi preduli maring budayane dhewek. Masyrakat mesthine ora rila yen
warisan budaya dipatenaken nang negara sejen. Gamelan, alat musik asli bangsa
kiye kudu teles dadi tuan rumah nang negarane dhewek. “Insya Allah nganggo cara
kiye bisa olih pengakuan sekang UNESCO dadi heritage of the world kaya dene bathik,“
tinemune.
Kanggone mahasiswa Udinus, tambahe;
kerjabareng kiye ora mung dienggo ngetrapaken elmu-elmu komputer sing diduweni,
sakure mahasiswa otomatis uga mraktekaken ITPreneurship utawa wirausaha bidang
IT (Suara Merdeka).
Gamelan
Tlaga Muncar Uga Divirtualisasikaken
Ora akeh wong sing apal irama Gamelan,
apamaning sing digawe tahun 1800-an. Nang sisi liya, kemajuan teknologi marakaken
publik gampang ngakses pirang-pirang aliran musik liwat media elektronik
kayadene laptop, ipad utawa handphone.
Ironise, kemajuan teknologi wektu
nikmati musik hurung akeh ngrambah musik tradisional, salah sijine Gamelan.
Gandheng-ceneng kondisi kiye, Universitas Dian Nuswantoro (Udinus) kerjabareng Pura
Pakualaman Yogyakarta njimot gambar lan ngrekam swara Gamelan Pusaka Tlaga
Muncar. Gamelan kiye digawe tahun 1800-an lan mangrupa salah sijine pusaka.
Rektor Udinus Edi Noersasongko
duwe pengarep-arep mbesuk ngemben Gamelan bisa ditetepna dadi warisan ndunya,
kayadene bathik. ’’Wosing-wos dadi kebanggaane inyong kabeh. Udinus duwe
pengangen-angen bisa nggebyagaken elektronik Gamelan nang UNESCO lan ameh wektu
kuwe uga UNESCO kesengsem banjut mutusaken Gamelan dadi heritage of the world,’’
preslahe.
Rekaman swara lan gambar nganggo teknologi
informasi dianakaken dina Setu-Minggu wingi mawi idin sekang KGPAA Pakualaman
IX, olih pituduh lan bimbingan sekang Pengageng Kawedanan Budaya lan
Pariwisata, KPH Indrokusumo. Ora mung idin lan pituduh, wengi sedurunge proses rekaman
dianakaken do’a wilujengan sing dipimpin langsung panjenengane KPH Indrokusumo.
Gamelan Tlaga Muncar kuwe Gamelan
Pusaka Pura Pakualaman Yogyakarta larase pelog dene laras slendrone yakuwe Kiai
Pangrawit Sari. Seprene, Gamelan Tlaga Muncar egin dipepetri, dirumat lan
sering ditabuh saben malem Setu Pahing. (Krisnaji Satriawan-69, Suara Merdeka).
Software
eGamelanku Digratisaken Nggo Masrakat
eGamelanku ana lan dianakaken nggo
njawab permasalah nang masrakat sing gandeng-cenenge ngambi endhepe apresiasi
seni Gamelan Jawa khususe nang kalangan generasi muda. eGamelanku olih dana
Hibah Penelitian sing disediakaken Pemrentah liwat DP2M Dikti tahun 2009-2010.
Mulane nggo mujudaken tanggungjawab lan terimakasih, Software kiye diwehna
cuma-cuma nggo masrakat sing mbutuhaken.
Pemrentah wis nglebokaken seni Gamelan
maring matapelajaran Seni Budaya. Nganti tekan siki siswa olih elmu kognitif
ngenani seni Gamelan, ningen ranah affektif lan psikomotorike egin endhep.
Salah sijine merga ora nanane prabot Gamelan nang sekolahan lan nang masrakat.
Nggo nganani prabot Gamelan mesthine kudu nyediakaken dhuit sing ora semendhing.
Gamelan wesi regane paling sethithik 40 juta lan Gamelan Prunggu paling ora 200
juta rupiah. Gamelan dadi barang langka nang negara asale, ningen dudu barang
langka nang negara liya (Saben sekolah nang Malaysia wis gableg prabot Gamelan
dhewek).
Liwat media kiye Tim eGamelanku siap
mbantu nginstall lan nglatih software eGamelanku. Software kiye ora didol,
ningen diwehna gratis. Ngemu karep gerakan cinta seni Gamelan Jawa nang
kalangan bocah nom-noman bener-bener dadi kasunyatan. Angger teles dadi
kasunyatan, jati diri Bangsa Indonesia tambah ningkat nang era global.
Kanggone institusi pendidikan utawa
non pendidikan sing kepengin nginstall lan pelatihan software eGamelanku ngajukaken
baen permohonan liwat email tyascatur@gmail.com
ditujokaken maring Kepala
LPPM Universitas Dian Nuswantoro Semarang Jl. Nakula I no. 50 Semarang Jawa
Tengah. Isya alloh dilayani ngambi senenging ati.
Sumber, http://www.eGamelanku.com
Re post by Bio
