 |
| Jengkol Archidendron-Jiringa |
Pak ogah ngromed,
mbanjut mbukak maning gulungane koran sing nembe dibanting. “Apa bangsane
inyong ora olih urip mukti…? nikmat ndunya baen mawi dielongi tut semendhing…,
lageanu awake dhewek wis ora jegos tuku iwak sapi merga regane nganti satus
ewu, desusul maning rega lombok abang ngambi brambang ya tekan sewidak ewu
sekilo. Mbanjut rega tahu ngambi tempe ya munggah ora sebaene. Inyong maca
Koran, dong semana Kang Wirya mendem tempe bongkrek, nganti klenger ngadeg merga rega-rega bahan lawuhan
wis ora ketuku. Lha siki giliran klangenan inyong dijabel, rega jengkol getug sewidak ewu sekilo mbari
barange ora nana nang pasar, sapa sing ora gemlethek.
“Ana apa bapane,
pethane pecucuan dhewek, kuwe toli wis tek gawekena wedang clebek nang salu”
Mistem bojone mapag Pak Ogah mbari atine semelang gumun. Ana wong nembe bali
olah raga dadi muring-muring, jebrad-jebred dhewekan sih pasale kenang ngapa?.
“Nikmate alam ndunya
wis oranana maning tem…!. Wong kaya inyong gari ngenteni modare thok, ora duwe
pengarep-arep. Kadaran jengkol sing udu kebutuhan pokok utawane ora akeh sing
doyan baen, siki regane lewih larang ketimbang iwak pitik tur barange langka”
Pak Ogah semaur ngambi ngelap kringet nang salu.
“Yaa sing sabar
Pak…, mengko inyong tek maring pereng mburi ngarah yuyu ngambi sisan met
klandhingan..! Dina kiye rika garep tek masakena pelas yuyu rasa klandhingan…!
Pokoke rika madhang karo lawuh kiye paribasan mertua liwat neng ngarepe baen
ora kober takon saking nikmate..!” Mistem ngedhem-dhemi.
“Kaya kuwe sih…, ya
mage gagean de gawe..” Pak Ogah ora sranta krungu janjine Mistem. Atine siki
wis mandan asoh lan duwe pengarep-arep maning, dheweke sadhar. Mistem bojone kuwe
pancen pinter ada-ada gawe menu panganan sing aneh-aneh tur rasane mesthi
nylekamin.
Seneng temen yah
dadi Pak Ogah, duwe bojo Mistem sing wonge inovativ.
Jengkol…,
Apa Jane?
Jengkol utawa
Jering (aran ilmiahe Archidendron Pauciflorum) nang wilayah Indonesia kewentare
aran Jengkol (Jawa, Betawi), Kicaang, Jengkol (Sunda), Blandingan (Bali),
Jering, Jiring (Melayu), Jaring (Banjar), Jaawi (Lampung), utawa Lubi
(Sulawesi).
Tanduran kiye basa
Inggrise Dogfruit utawa Ngapi Nut. Basa latin (aran ilmiah) Archidendron
Pauciflorum, sinonime Archidendron Jiringa, Pithecellobium Jiringa, lan
Pithecellobium Lobatum.
Klasifikasi
ilmiahe; Kerajaan: Plantae; Filum: Magnoliophyta; Kelas: Magnoliopsida; Ordo:
Fabales; Famili: Fabaceae; Upafamili: Mimosoideae; Genus: Archidendron;
Spesies: Archidendron Jiringa.
Dhuwure wit Jengkol
(Jering) bisa nganti 10-26 meter. Wohe rupa polong gepeng lan mlungker. Werna
woh Jengkol lembayung tua. Sewise tua, wujud polong who lan nggon wijine
mblendhung meteng. Saben polong isi 5-7 wiji Jengkol. Wijine ana kulit arine
tipis werna coklat melong.
Mangpaat
Lan Mbilaeni-ne Jengkol
Senajan kaya kuwe
Jengkol uga nduweni efek negatif sing mbebayani tumrape menungsa. Sepisan,
Jengkol ngandung asam jengkolat (jengkolic acid) sing kadare dhuwur banget,
mulane kakehan mangan Jengkol marakaken numpuk kristal nang saluran urine, sing
diarani ‘jengkolen’. Gejalane mules, lara weteng ngambi mutah-mutah, nguyuhe
perih, banyu uyuh (urine) ana getihe, crat-cret lan ana titik-titik putih kaya
glepung, kadhang-kadhang malah ora teles nguyuh babar blas.
Ping pindhone, ya
mesthine mambu embok. Wiji Jengkol sebenere ora patiya mambu pisan. Mung sewise
dipangan, ndadekaken efek mambu nang nafas utawane banyu uyuh.
Senajan marakaken
mambu lan ana anceman asam jengkolat, nyatane akeh wong seneng nganti edan
Jengkol kaya Pak Ogah contone. Wiji Jengkol utawa Jering pancen dadi salah
sijine menu favorit sebagian masyarakat Indonesia, Malaysia, Thailand, lan
Filipina.
Jengkol Nuwuhaken Selera Mangan
Pecandu sering
ngrasa abot angger kudu ninggal klangenan Jengkol. Senajan lagi diet, ninggal
Jengkol marakaken uripe kesiksa, aluwung ora mangan liya-liyane ketimbang ora
nganggo Jengkol.
Ana pengalaman
nyata sing mreguyokena. Kanca inyong nang kantor kenang prenyakit kelainan
darah. Awak sing maune bobot 60 kg anjlog nganti kurang sekang 40 kg. Obat sing
dipangan werna-werna, sedina 5-6 tablet karo kapsul kudu diuntal. Apamaning
dokter wis monis umure gari setahun. Dasar imane kuat, tawadhu lan humoris,
dheweke ora urus vonis dokter sing marakaken saben wong sing krungu dadi
mrinding lan gawe cilik ngati.
Wis amper wolung
wulan inyong ora ketemu ngambi dheweke, mergane kabeh-kabeh padha sibuk
pegawean. Mbareng ketemu inyong kaget semelang gumun. Ingatase wis kenang vonis
uripe paling-paling gari pirang wulan maning, koh bareng ketemu malah dadi ayu,
awake bahenol kaya lonthong, pipine mandan tembem, lan latahane tambah dawa.
Keprigen goli njaga kondisi awak nganti teles pulih, malah kayong lewih
sehat ketimbang wektu prawane gemiyen.
Inyong ora tahan
kebingungen dhewek, mbanjut takon:”Ade…., mretamba ngendi? dokter ngendi…?
alhandulillah kowe bisa waras bedhigas kaya dong prawan gemiyen!?”.
Diwangsule ngambi
cengar-cengir:”Jengkol!”. Inyong kebingungen urung mudheng, mangsa iya temen
jengkol sing mambune por tur kadhang-kadhang marakaken jengkolen bisa dadi
tamba?.
Weruh inyong ora
mudheng, dheweke mbanjut ngomong maning:”Sewise inyong divonis umure gari
setahun, saben mbengi nangis ngguguk-ngguguk, inyong pasrah ngambi Gusti Alloh.
Inyong sholat istikharah. Sing wusanane duwe keyakinan jero yeng mati-urip kuwe
duweke Gusti Alloh. Mulane inyong njut ora nana pantang mangan. Wong kiye tahun
pungkasan, inyong mangan sesenenge, ora nana sing tek ilari. Inyong sering
botram (Sunda=kepungan mangan rame-rame) sa-keluarga lan kanca-kanca sekantor.
Jengkol ora tau keri, kadhang dicoel ngambi sambel, digawe semur utawane
digoreng. Molahi kuwe, awak inyong rasane lewih kepenak, bobot timbangane
nambah, rasa lemes ilang, terus kepenginane mangan baen. Penyakite suwe-suwe
ilang karepe dhewek, inyong priksa laboratorium ngambi kontrol dokter
langganan, jere inyong mari, waras maning. Siki ngkono weruh embok, inyong wis
ora mretamba maning, teles nerusaken kuliah, munggah kaji, lan pasien inyong
nang ngumah mili-mintir padha ngantri. Kuncine mung siji ‘selera mangan” inyong
siki robah total, sing penting ora keri semur Jengkol..!”.
Seseseh… simpel
temen deneng, Jengkol teles nggo nuwuhaken selera mangan.
Kuliner
Jengkol Ngrambah Manca Negara
Masyarakat
Indonesia sing manggon nang Zurich, Swiss, tau gawe acara Pasar Senggol. Acara
sing dianakaken saben tahun kiye tujuane nggo ngenalaken kuliner Indonesia
maring masyarakat Swiss. Pirang-pirang panganan khas Indonesia dipameraken.
Pasar senggol kiye uga dadi wadah kumpule warga Indonesia sing kangen kampung.
Siaran pers KBRI Swiss sing diumumaken Sekretaris Bidang Pensosbud, Mohammad
Budiman Wiriakusumah (TN, 09/07/2012).
Warung Konsuler
kuwe wujud pelayanan nggo masyarakat Indonesia nang Swiss. Umume masyarakat
sing sibuk saben dinane ora kudu repot-repot meng Bern ngurus paspore, cukup
teka nang acara kiye bareng keluargane ngambi kangen-kangenan swasana pasar
Indonesia.
Ana crita lucu awan
kuwe, Yanthi Sidler bakul rames sekang Jawa Barat nerangaken bab Balado Jengkol
sing didol, mergane sing garep tuku wong Swiss "ngotot"
kepengin nyicipi rasane Jengkol. Karepe Yanthi wong kuwe aja nganti tuku lan
nyicipi Balado Jengkol, wedi mbokan mambu. Ningen wong kuwe tetep meksa, mulane
Yanthi ngrilakaken. Mbareng 2 jam sewise mangan, wong Swiss mau cengar-cengir
ngambi ngomong: “Iya, kenang apa sampeyan menging inyong aja nganti mangan
jengkol, nembe ngreti akibate mbareng metu sekang kakus” (DN, 09/07/2012).
Tata
Niaga Jengkol
Sayur-mayur kaya
Jengkol nang Garut Jawa Barat regane mundhak dhuwur banget, sekilo nganti Rp.
32.000,--, dibandingaken ngambi iwak ayam sing mung Rp. 26.000,-- sekilo.
Malahan miturut brita televisi nang pasar Bekasi rega Jengkol wis tembus Rp.
50.000,-- sekilo.
Salah sijine bakul
sayuran nang Pasar Ciawitali, Guntur, Garut, Ayi ngomongena yen wulan kiye rega
Jengkol mundhak terus, biasane mung Rp. 5.000,-- sekilo. "Wis larang,
barange angel digolet". Bakul sayur sing biasa nyandhing Jengkol siki ora teles ngladheni langganane.
"Warung panganan wis padha pesen pirang-pirang dina, ningen nganti wektu
siki inyong ora bisa nganani”. Ayi ora mudheng kenang apa Jengkol bisa ilang
nang pasar, ngretine ya Jengkol sekang
Sumatra utawa Jawa Tengah mung semending. "Dikirime semendhing, inyong ora
tau kumanan", Ayi nyambung. Dede (45) bakul iwak ayam melu nyela, jere wis
sewulan kiye Jengkol nang Pasar Ciawitali langka. "Ya, tangga inyong akeh
sing pesen Jengkol, angel digolet, regane larang, malah lewih larang ketimbang
iwak ayam", sambunge (TN, 30/05/2013).
Plekara kiye jane
sapa sing salah?
Nek bakul mesthi
nganut hukum dagang, barang langka rega mundhak, barang akeh rega mudhun,
kejaba ana
rekayasa spekulan.
Marakaken ora
mudheng nganti kedrawasen, mangkaning Jengkol kuwe dudu barang niaga strategis
sing saben wong mbutuhaken lan kudu olih.
Jengkol
Dadi Katalis Pekolihe Pajeg
Planggan warteg
utawa warung cilik liyane kudu siap-siap ngetokaken dhuwit lewih akeh angger
mangan nang warung. Sebab pajeg 10 persen garep dijukut sekang warung sing duwe
omzet minimal Rp. 60 juta setahun. "Pajeg kiye ora ngenal sebutan, garep
warteg, warung makan padang, lan liya-liyane, angger omzet dodolan panganan lan
inuman lewih sekang Rp. 60 juta, bakal nempel kewajiban dadi Wajib Pajeg,"
preslahe Kadis Pelayanan Pajak Pemprov DKI, Iwan Setiawandi.
“Pajeg kan nggo
mbiayani pembangunan. Angger biasa mangan nang warteg Rp. 6.000,-- siki kudu
mbayar tambahan 10 persen pajeg, dadine bayar Rp 6.600,--. Inyong ya cokan
mangan sega goreng nang warung, seneng Semur Jengkol nang warteg. Mengko angger
mangan nang warteg inyong ya kudu mbayar tambahan pajeg” (DN, 02/12/2010)
Jengkol...,
Jengkol... Mbegidhigi temen deneng.
Doc. By Bio
