Fenomena***
Sing garep
dicritakaken babagan celeng boyong nang Slatri.
Slatri, kuwe
sawijining panggonan sing genohe nang kecamatan Karangkobar mlebu tlatah
Kabupaten Banjarnegara sisih lor. Gili aspal sing nyambungaken Kota
Banjarnegara liwat Banjarmangu gutul Kecamatan Karangkobar liwat ngeneh
kepetung egin duweke pemrentah propinsi. Angger diterusena ngalor maning notog
pretelon Bale Desa Wanayasa, mengulon maring Kalibening jog Pekalongan, ngetan ngliwati
Kecamatan Batur jog tekan Dieng.
Giline wis diaspal tur klimis pisan. Seumpamane
kepengin ngeneh kudu numpak ubluk, montor roda papat, angkutan perdesaan utawane
truk sayur lan kewan. Aja mbrangkang, mlaku, utawa mlayu…, sikile teklok.. ora
getug…! Angkutan perdesaan rit-ritane
digilir lan diwatesi, dadi jam mangkate ora saben wektu, angger wis langka
paling-paling nunut numpak truk mped-mpedan karo wedhus utawa nylesep neng
tumpukan kranjang sayuran. |
| Ilustrasi |
Sesawangan tepis
wiring gili molahi sekang Banjarmangu tekan Kalibening utawane Dieng katon
semanger; ana gunung sing biru slimutan pedhut, perenge ijo royo-royo, kaline mengkal-mengkol
kaya ula nglangi, asri tur mbetahi. Kahanan giline manjat-medhun neteg banget, dela-dela
menggok ngetutaken gigir gunung utawane pereng sing diliwati. Mulane angger
liwat ngeneh kudu ngati-ati lan waspada, wong ijig-ijig cokan papagan karo
ubluk utawa truk, dadi angger ndlenger bisa gedandapan. Gunung sakubenge Slatri
meh dadi alas pinus kabeh, perenge rungkud alas tutupan. Nang ngkene udan
bebasane meh oranana mandhege, hawane adhem tur silir-silir seger. Mulane cocog
pisan dadi habitat (papan) kewan alas kayadene macan jawa, kethek, kucing alas,
celeng, luak, manuk, ula, kadhal, menyawak lan rupa-rupa bangsane walang. Umume
kahanan lemahe miring pating jumpampleng mulane ora teles digenohi umah lan tanggan
umah pada doh-dohan.
Kedadian ana
celeng ngiring kuwe kira-kira tengah tahun 1981 wulane inyong wis kelalen,
dinane Ahad wayah sandhekala.
Meh saben
rong minggu sepisan inyong bolak-balik Sokaraja – Wanayasa njujugena bojo
inyong sing ngodhene neng Wanayasa Banjarnegara. Mergane ngesuk ana tugas nambani
wong sing pada mriang mules-mencret-lodong nang salah sijine ndesa kluthuk sing
adoh kang kota kecamatan, mulane sore kuwe kemudu-kudu wis guthul umah dhines
prelune bisa nata bedhama karo tambane (obat-obatan) sisan ngarahe ngesuk wis
ayem gari mangkat.
Dina kuwe nang
Sokaraja udan ngeyes ora mandheg-mandheg tur sedulur lan kanca-kancane bojo
inyong padha teka ngumah, mulane mangkate dadi mandan randhat.
Upamane
nganggo angkutan umum wis ora teles, kesoren.., supire wis padha laut, sidane
nganggo ubluk. Playune ubluk kudu alon-alon wong mesine uwis tua, gawane mendot
pating kethantil, utawane giline lunyu, mulane ora kena nubras-nubras…,
mbilaeni.!
Klampok wis
keliwatan, mbanjut mBawang, wadhuk Mrica (Siki aranane waduk Jenderal
Soedirman) terus nuju Wanadadi (desa klairane Ebiet G. Ade). Tekan ngeneh
giline egin lenceng tur rata. Ningen bareng ngliwati antarane mBanjarmangu
tekan Pawedhen, giline menggak-menggok tur manjat neteg, marakaken mesin ubluke
panas sementlep, detambah-tambah mambu olie gosong.
Mbokan
sedulur kepengin ngreti tek tidhoki, yen Pawedhen kuwe panggonan plesir padusan.
Banyune bening, hawane adem seger, alas sekubenge egin rungkud, tur ana
kewan-kewane.
Inyong mandheg
ngasoh dhimin ngadhemaken mesin ngambi nglemesaken beyekan sing krasa bengkek.
Sedawane
ngasoh, gendhu-gendu rasa karo mbekayu Sartinem sing umahe ditunuti nggo ngaub.
Inyong padha disandhingi jagung godhog jere goli panen ngkebon mburi, lewihan
ditebasaken. Mbekayu Sartinem menging inyong: “aja deterusna manjat, aluwung
padha nginep ngkene baen wong wis peteng, udane gemrejeg, bledhege
nyander-nyander…, mbok ana apa-apa nang tengah ngili ora nana sing nulungi”.
Tek pikir-pikir pancen bener, angger nganggo montor roda papat lha mesthine ora
masalah.
Merga
kemutan tugas ngesuk utawane sing padha mriang mbok oranana sing nambani, bojo
inyong aweh kodhe kudu tetep manjat.
Bareng mesin
ubluk wis mandan adem, inyong njaluk pamit.
Ngambi salaman, mbekayu Sartinem komat-kamit nganggo basa mBarjarnegaran
ndongakaken inyong padha ngarahe slamet ora nana alangan tekan ngenggon.
Sejroning ati inyong ngrasa kesuwun banget maring Gusti Alloh sing Maha Kwasa,
gedhene jaman wayahmene egin ana wong preduli maring liyan kanthi ikhlas.
Mulane ya inyong gagean ngamini.
Inyong
mangkat maning.
Manjat,
mudhun, menggok maning, manjat maning, mudhun, menggok.., kaya kuwe seteruse
ngambi njaga playu lan kaseimbangane ubluk ngarahe ora mlarak terus njegur
jurang.
Mlebu
wengkon Slatri wis wayah mahgrib, senajan udane nyiliki ningen swasanane peteng,
padhange mung sekang lampu ubluk lan pisankala cloroting lep-lep.
 |
| Ilustrasi |
Mbang kiwe pereng
gunung pinggire kalen sing ana banyune ndledek banter banget. Mbang tengen alas
Pinus, ngisore maning jurang wit-witane rungkud getug ngkali, desawang sekang
nduwur peteng dhehet lelimengan.
Lagi kepenak-penake
nyetir ubluk…, ijig-ijig ana swara kemrosak kaya klari digered nang kebon… Nang
pereng sisih nduwur uga ana swara pating gruiiiiik saur manuk desusul “gedebuug”
kaya karung beras dibalangaken meng tengah nggili. Barang sing tiba gedhene
segudel, rupane ireng kethewek.
Ndadak
sontak inyong ngerim, sorot lampu ubluk tek tujokaken meng barang sing miki nembe
kanteb mbok kringkel, dohe kira-kira 15 meter sekang nggon inyong mandheg. Semelang
gumun, apa sing nembe kanteb..? apa watu ngglundhung kenang udan..?
Mbareng
dimat-mataken jebul celeng ireng.
Ngreti ana
menungsa utawane swara mesin ubluk deserokaken, celeng kuwe gagean menyat ora
ngambi tingak-tinguk plencing mlayu sipat kuping mlebu ngalas pinus mbanjut mlumpat
meng rungkudan.
Tembe baen krasa
lega sawise celeng mau lunga, eee.. ana maning celeng ngiring gemrudug pada
tiba kedhongsok-dhongsok, mbanjut pada menyat dhewek baris urut kacang siji-siji
kaya deprentah. Gedhe, cilik, sedheng,
gedhe maning, cilik, sedheng maning lan seteruse kaya diatur nang komandane.
Sing mau tiba kanteb dhisit dhewek kae kayane cucuk lampah (cara pengantene)
sing dipurbawasesani mbukak gili. Tengere awake seseg tur gadile wis metu loro
senajan urung patiya dawa.
Ora ganti
suwe inyong kaget sangkete nganti kamitenggengen, mergane nang sisih kiwe nggili
rembuis ana celeng gedhene sekebo lanang ngadeg, matane mencenger ngawasi
kahanan sekubenge klebu inyong. Dedeg piadege pideksa, wibawa, mata mentheleng,
wibawa, gadhile papat mlengkung dawane antara 20 tekan 30 cm kaya gadhing
gajah. Suri nang gigire ngadeg wiwit sekang pundak tekan beyekane.
Kayong lagi
aweh prentah maring rombongane supayane padha gagean mlayu. Embuh… gari inyong
ora mudheng wong nganggo bahasa celeng, krungune ya mung senggrak-senggruk
thok.
Swara mesin tek
alonaken, lampu sorote nganggo sing cilik lan madhepe ubluk tut semendhing tek
owahi nggo ancang-ancang mlayu nggolet keslametan, wong mbok ijig-ijig pikirane
celeng owah mbanjut nyenggruk inyong.
Bojo inyong
ngedhem-dhemi, goli obah alon-alon bapane karo maca surat Al-Alaq.
Wektu kuwe
sing kepikir mung keprigen caranya mlayu nggolet keslametan. Inyong kemutan
nang begasi ngarep ana olie sa jrigen cilik. Tek jimot banjur di-athur-athuraken
sakubenge ubluk, nang pikiran inyong angger kewan kiye ngambu olie toli ora
betah terus minggat. Temenan, celeng lanang kuwe keton gelisah ora anteng ngrasa
keganggu, sedhela-sedhela congore dungas-dungis ngambu-ambu ganda olie wutah.
Disusul
maning winihe sing awake bongsor gedhene sa babon kebo mung ora gableg gadhil,
ngungkluk nggawa rombongan genjik, desusul maning mburine rombongan celeng
tanggung.
Angger genjik
sing cilik-cilik mlakune culat-culit jentritan karo slempetan, nang babone
langsung disurung kon mlebu mbarisan. Saben rombongan cacahe antara 15 nganti
20, neng ngkono ana babon, dhere lan genjik.
Bojo inyong
ngetung sejrone 25 menit, celeng sing liwat cacahe wis 40 rombongan konvoi
mbanyu mili ora pedhot-pedhot. Senajan wis akeh sing liwat, komandhane egin dhigreng
ngambi nggatekaken lakune rombongan.
Ana maning
rombongan celeng lanang sing wis metu gadhile antara loro utawa papat, kehe 25
celeng, mlakune kompak lan rapi pisan.
Wektu wis ngentongaken
30 menit, ewondene urung ana tandha iring-iringane rampung, egin ana maning
kehe 10 celeng sing mlakune kethingklang-kethingklung dengklangan, sewetara ana
sing mlakune temungkul baen kaya lara gulu ditutena babon sing gedhene sa kebo.
Kayane rombongan kiye isine celeng mriang utawa kapilaraen deprewasa. Seteruse
bayi abang cilik-cilik pisan cacahe 60 genjik, mlakune alon banget dikawal
babon telu lemu ginak-ginuk.
Ngancik 40
menit, celeng komandane ndungis karo ngguik dawa pisan. Inyong trataban kewatir
mbokan amleng-amleng nyenggruk. Ningen koh egin neng enggone, mung guli
guak-guike tambah kerep. Ora nyanaha tongol liwat maning rombongan kehe 12 celeng
sing gedhene se kebo lanang. Gadhile wis
dawa-dawa ningen wulu surine hurung dawa. Antarane ana sing pundhak lan gigire
dleweran getih kaya bubar tarung utawa dicokot kewan galak sejen.
Mbareng
rombongan sing padha tatu wis liwat kabeh, ijig-ijig komandane mlumpat nyebrang
dalan terus mlebu alas pinus.
Ndadak
sontak mesin ubluk tek gas lan swarane tek serokaken, lampu gedhe tek sorotaken
meng dalan sing garep nggo liwat. Aku ngomong meng bojo inyong ngarahe cekelan
sing kenceng siap-siap garep ngebut.
Mbareng
giline wis tek anggep aman, inyong mbanjuraken laku.
Sejrone
mlaku inyong karo ngudarasa.
Kiye kuasane
Gusti Alloh sing Maha Pemurah…… inyong slamet sekang senggrukan celeng karo
maning diweruhi fenomena alam sing ora niba nalar; gedhene celeng mung ngugemi
naluri thok teyeng koordinasi ngrukunaken masyarakate kanthi rasa tresna, eman,
lan tanggungjawab, ngeridaken wargane boyongan meng wewengkon sing njanjekaken
penguripane.
Komunitas sing
cacahe atusan kiye kayane boyongan sekang tlatah Kalibening utawa gunung Rogojembangan
lan sekubenge, kayane ana owah-owahan kahanan alam, lumbung panganane wis
entong, utawa habitate keganggu.
Gawean kaya
kiye mesthine nganggo survey ala celeng dhimin. Mbareng swasana utawa kasil
analisane celeng wis dianggep cukup mbanjur wargane dikeridaken boyongan.
Walahu’alam bisowab.
Sing lewih nggumunaken
maning kuwe keprigen carane celeng goli mbagi-mbagi klompoke men ora padha okol
utawa kerah ningen wargane kabeh bisa mangan wareg nang wilayah anyar.
Nyatane
nganti tekan seprene hurung krungu kabar dherik utawa sawah nang Kapupaten
Banjarnegara lan sakubenge sing nganti puso detedhak celeng ngiring, mangkane
cacahe atusan bebasan nganti angel gole ngetung.
Mesthine
angger nedhak bareng sawengi baen pirang-pirang hektar tanduran pertanian bakal
ludhes. Embuh ngesuk ngemben.
Kiye bukti
yen celeng angger nggolet pangan mung saprelune weteng, beda banget karo
menungsa sing nganggo aji mumpung, ana sepira baen, perlu ora perlu, malahan
halal ora halal sebisa- bisa dekeruk kabeh degawa mengumah.
Dadi ujare
celeng; manajemen bangsa celeng kuwe egin lewih maen tenimbang manajemen bangsa
menungsa…, ndean..!.
Doc. By Bio
Warta sing ana gandheng cenenge babagan celeng bisa de
longok nang blog ngisor :
Tidak ada komentar:
Posting Komentar